Zo MI te MIN LEH PUAM: (naumin phuak)

     Tulai Zo Mi suan leh khak tampi tak mah Muntuamtuam ah ki omtek aa, Minam tuamtuam lak ah kikhuasa(Minam dang tawh omkhawm) ih hihman in Zi leh Ta thakkhawng kinei hi, Min leh Puam lamdang nono khawng ihphuak khathei hi. Leitung bup in minpen a thupit sak mahmah khat hi aa, a hihhangin Min leh puam kipiak dan kibangkim lo hi.pawlkhat ten Naumin a phuah uhciangin Family name(beh min) ah a pa min koih uh hi.

              tuaban ah Zo min khat koih uh aa, azom ah mangmin koih uh hi. hihbangin tate min a koih uhciangin a tamzaw in a mangminbek tawh sam uh a hihman in, a Zo min pen mangthaang sak in a minam hihna zong a beibei tawh kibang hi. a diakdiak in gamthumna tung Zo Mi te in Naumin phuah pen ihngaihsut mahmah ding kisam hi. genteh na in!! kei kamin pen Pau Go Mang hi. ka tapa min pen Lian Khan Mung hiaa, kabeh min pen gualnam hi. pawlkhat ten minvawh dan en pakleng Peter Liankhanmung Mang(family name) cihbangin naumin piakha thei uh hi.hihbang in naumin a phuah uhciangin Liankhanmung in kisaam lo in Peter in kisam zaw a hihman in, a zo min bei(kizang lo) hi,Mikang dan leh Zo Mi te min kipiakdan zong kilamdang lo hi.tua a hihman in mangmin sese zong neih dingkisam lualo hi. Biakna tawhkizui-in Mi siangtho min neite in biakna min hi henla ihmin ban ah behmin guanding in hoih ka sa hi Lia Khan Mung Gualnam cihbangdan hi leh ih tuta ten tuzawh kumza lom dongin nazangleh Zopau atheih loh uhhangin Zo Mi hihna Zo Min leh Zo Mi behmin mangngeilo ding hi.
                tua a hihmanin  Ipu ipa ten khanggui kizom aa, min a phuah nate uh na thupi mahmah in khiatna nei mahmah dingin na phuakse uh hi banghang hiam cihleh tua hunlai takin.lai neilo a hihman un. Laitangin a zat khat uh ahi hi. Minphuah ziapen namnih na om sakin tual minphuah leh sila minphuah na ci uh hi.
                        Tual minphuah a cih te uh pen kitappih nei aa, ki phuak te a hi aa, sila minphuah a cih te uh pen a suahhuna a thupiang khat peuhpeuh hang, ahihkei leh phawkna hang, hoih asak khatpeuh a kivawh tawm( Mangmin khawng vawhtawm), Tap neilo mi khatpeuh in a vawhtawm mawkmawk minte a hi hi. Tuate ei zomi lakah a zang kitam mahmah ta hi. Min leh puam kiphuah ziate pen khangluite in tualmin a cih mahbangin a mawkmawk in kiphuak lo a, khiatna nei-in naphuakse uh hi.
                  Nidanglai-in thu leh la tangthu, lungdamna, dahna phawkna, hihna zaa, neih leh lam, gawh leh lup te ciapteh na dingin lai neilo a hih manun, min a
phuak uh ciangin tuate siksan in kiphuak a hihi. tua a hih manin min icih pen khiatna nei mahmah khat hi aa, khangsim na-ah zong athupi mahmah khat aa, kingaihsun khat a hihi. Khangsim nabangah mintawp na pan in kila suk diamdiam in khangsim na nuamtuam mahmah hi. Minpen a kiphuak ciangin behleh phungsung, khuasung teng ki hil in  nuamin phuak nungei ci-in neihdan tawh kizui-in gan kigo ham tang hi.naumin puahna gan pen a tangpi thu in bawng, leh vok kizangpen hi. Tuani ciangin atu nei ding pa(nu) in naumin ding pu lak khia panin a naumin khiat na (adeihna) pen la in sazeu in zu leh sa inphuak uh hi.
Naumin pen ipu ipa te in naumin a kipiak uhciangin, a banban in kipia uh aa, angahding pen theihsa in om ahih manin, hihbangin kipia uh hi.
                    Tapa sal teng pasal pa,numei pa,pasal sanggampasal teng (pasal lakah a u pen kipan),numei sanggampasal teng(pasal lakah a u penpan kipan) cihbangin kipia hi. tuamah bangin Tanumei a hih leh hibangin ki pia hi, pasal nu,numei nu, pasal sanggam numeiteng(ani teteng) a u penpankipan, numeisanggam numeiteng(anu teteng) a u penkipan in kipia  hi.
      Tuhun ciangin mipawl khat te'n a ut peuhpeuh pia mawkmawk in khangzong kisim thei nawnlo liangin a om pawlkhat kiom ta hi.  pu leh pa ten hong phuahsak minte kizang nuam lo in i ut khat peuh ei ma thu-in vawhtawm hi, hihpen ipupa te salminphuah a cihte ihzang mawkmawk hi. Zo min zangnuam lo in Mangmin, Vaimin, Kawlmin khawng i zat pen vaphual kimlai va-aksuak nuam tawh i kibanghi. Na minam leh namipih na itnak leh namin zumpihse kei in la, namdang te lak pan in, na Zomin a kidawk nadingin hanciam zawle cin, Zomi picing khat nasuak ding hi.
                                                            laiat.....Pa Gomang