Zo Mi te SIALSAWM PAWI.

            Zo Mi ten ihpi ngaihsut mahmah a hi, Sialsawl pawi hongtung kik ding hong hita hi sialsawm pen lawhdan kibangkim lo in pawlkhat ten khuado pawi a cizong ki om hi pawlkhat ten lah Tualbawl/Lawm annek / khuabawl cihbangin kilo tek hi, Sialsawm leh Lawm-an pen kikhen ngeilo hi. Sialsawm Lawm-anneek kipatni pen Tualbawl kipatni hipah hi. Khangluimite in Sialsawm cihleh Tualbawl cih kammal khatpeuhpeuh azak ciangin, a kibangin saangpah lian uh hi.

                Zo Mi ten Khuading ihzon ciangin gamtaak-leihoihna kizuan hi. A lauhuai sapite leh dawi leh kau,gulsia tangsia, ngia leh vompi sahangte, pulnatna tuamtuamte nawkkhakna panin ahu-akem dingin, Asiam ahi Khuasiam khai (Bia)masa uhhi. Khai, cihpen, bia, lungkimsak, thoih cihna hi aa,Tua pen Sialsawm ihcih Tualbiakna ahi hi.Tualbiak nasep leh Sialsawm Lawm-anneek kizom tawntung hi.Zo Mi ten Khua ihsaat ciangin kimawksaat lo hi. Siampi, Hausa, Taangko, Tuinaakkhuat, Tuakteek, Siikseek leh Khuangtum a omlohin khua kisaat ngeilo hi. Tuikhuukkhuaatte kisawl masa a, tuihoih tuilim amuh cianginkhuasaat kipan uh hi. A masa penin Khuasiam ding leh ahuu-akeem ding kisam masa a, tua pen Tualbawl or Tualbia kici hi.Tualbiak piak nadingin  Vok nazang uh hi. TualBiakna pen khuataangpi/khuabup  aa hi-a, Zozu lawhta-in dong uh hi. Tualvok leina dingin, lawhta mahtawh buhhuum/vaimim/sii/gaa nadong uh hi. A beikhempeuh taangpi sik ahi hi. Khua dingin gamtaak-leihoihna kizuan hi.

Tua Biakna ah khuasungmite cidamna ding leh, kithu tuahna dingahizongin, guahtuiluan hoihna dingahizongin, ankung susia thei lungnote a omlohna ding, gahleh pak hoihtak aneihna dingin kingen hi.


Tualbiakni a zingciangin Zehtang uh hi. lokuan lo in Leigil suaksak lo hi. Singno leh lopa susia lo hi.Zehphi ci-in thukham palsat a om ciangin,guahtuiluan hoihlo hi naci uh hi. Khuasungah thusia lasia piang thei ,Pulnatna tuamtuam in nawk thei hi ci uh aa, Zehphi  aomkhak ciangin Tualbawl kik uh hi. abeikhempeuh Zehphi khaten liau sak uhhi.

Tualbawl ciangin innsimah tungmansial bawlin, cianglawh dimin koih uh hi. Tangho tumtanin koihkhawm uh hi. Tualbiakna voksi tungmansial te tungah taatin biaknatau tungah kha or pia uh hi. Tua tungmansialte pen innsim khatta ahi hi. Dawite khemin tungmansial pia uh aa, Thupha ngen uh hi.Tualbawlni pen Sialsawm kiginni hi-a , a zingciangin Sialsawm Lawm-an neek kipanin kizom tawntung hi.Lawm-anneek pen Pu kikhat leh Pakhat sungaa piang sanggam teng kipawl hamtang hi. Amau neihzah zui-in alimthei pen ne uh hi.  Aneite in, bawng,vok go uh hi. Azawngte zong amau hihzawh zahzah tawh hanciam ve uh hi. " Sialsawm cih buang sialzong sawmzolo akta/Saseh beek kikum ve ni e," ci-in, ak/saseh tawh Sialsawm uh hi. Sialsawm sungin Nungak taangval kingai te a hih keileh Nu leh pa Unau sanggam ten a deihsak te Zawlan kikhawl/kipia uh hi. hihzawlan pen kikhamna namkhat hi-in, tualo Zawl leh Zawl zong an kikhawlh in sung leh pu/ U leh nau cihbangin asialsawm an tek uh kiciamsak tek uhhi.Tuazahin ih Pu ih Pate in Ngeina limci, ci-in hamsa bawl uh hi.
                                                        
                                                                                                 Laiat......Pa Gomang