Zo Mi te Ngeina kizep na Nik leh Puan te

Nidangin Zo ngeina Puansilh dingin Pat naciing uh hi. Hih pat tungtawn in, Puanzaa dan namkhatbek kinei hi.Zo Mi sungah Khutsiam na tuamtuam hong omtoh ciangin Patkhau ngiat khuttawh hek in gan uh aa, Tualpuan cih Puan aak namkhat hongpiang masa hi.a hihhangin Pat a kang leh asan bek kinei a hihman in Tualpuan san leh Tualpuan kang bek kinei hi.

Galpi khat na leh Nihna kikal sungteng in Zo Mi ten Ihnam puan puah hongkipan in, a mel a tuamtuam tawh zem hongkipan kia uh hi.tua a kipan in Zo Ngeina puan te tawh kisai-in (1)Sun aa, silhding nasep puan, (2)Kizep na puan, (3)Tungnung na puan leh (4)Zan aa silh puan ci-in khen li kinel hi. tua telak ah khenneu in (A)Numei puan leh (B)Pasal puan ci-in khenneu nih kinei hi. Atangpi thu in Kawlgam in suahtak na hongmuh ciangin Minam kim in nampuan kineikim tek aa, ih minam puan kumpi tung lahding hongkisap ciangin a hoih zaw tektek dingin kipuah toto in tulai khangno ten ihsilh a hi Zo Paun te hongsuak hi.Hih Puan te in min tuamtuam nei uh aa, (1)Tualpuan   (2)Mawngkhak (3)Puan Laisan (4)Puan Mongzem (5)Khe Phiau (6) Niksing (7) Kawnggak (8)Taangciin (9) Puan Mongvon (10) Puan Dum (11)Nikvom (12) Zansilh Puan bu cih te a hihi.

Nidang lai pek aa, Ih Pupa te puansilh te en lehang,
Tualpuan::::Zo Mi Pasal te nasep puan te:::Zo Mi Pasal te in sial hongcingthei hunciangin puan kisilh pan hi,tualkhau kihek tawm akigan Paatpuan kang hi-in atual dildel a ngawng pan in akhukciang a pumkhui a hihi. Apuan ang kilh na pen Tualkhau kikhuk Khauzang nih akikhihtuah a hihi.Puankang puah haksa a sate in Muantui tawh Niam uh aa,a vom leh a kang kigawm a hihman in puang hilhelh hi. Nin kilanglo ci-in puah noptuam ci-in a zangpawlkhat om hi.hih tualpuan silhin a kawng ah savuan kawnggak( savun a langtuak ah khauhual tawh kipeh) tawh gak uh aa, kip tuak mahmah hi. Tua puan te a silh in a din uhciangin a ngawng pan in a khuk dong khuh hi. Atut uhciangin a kawng nuaisiah puan tepkai teng a anglam ah koih uh a, pheituam sungten a ten loh uh hangin azahmawh teng selzo hi.Tua a hihman in Zo Mi te pen Ipupa hun laipek a kipan in Seldingin a kilawm te a selsiam Minam te ih hihi.

MawngKhak:::Numei te nasep puan::::: Zo Mi Numei te naucing in hongkizat theih hunciangin  “Mawng Khak” cih puan(Niik) hongteng uh hi. Hih “Mawngkhak” kici pen Muitung khau ngiattawh Ciptak  a kikhuk khauzang agat uh hi aa,akawnggak tawh khih in,akhuktung deuhciang pha hi.Anung a mai akawng kimvel dim in a kai, mawngzung tawh a kibang khauzang kaisak uh hi.Hih “Mangkhak” teengin a tut uhciangin a nunglam aa kaai teng leh a mailam aa kaai teng, aanglam ah siakhawm uh a hihman in azahmawk dawklo hi. Tuaciangin Numei te puan aak pen Tuakhau mah a kigan hi-in a ngawng pum in abanzong pum hi.tua puanaak pen a lenuai dungsuk leh abaan taw tengah tepkaai nei hi. Apuan ang kilhna uh pen khaumah a zah uh a hihman in kipmahmah aa, liangkhai a silh loh uhhangin a ang uh dawt lo hi.

Puan Laisan:::::Pasal te kizepna puan:::::Zo Mi pasal te hongtangvaal ciangin lawm leh gual lak ah kihel nuamta a hihman in,hoihding a ut hunlai tak uh a hihi. Tua hunlaitak mah in kizep na hoih leh a etlawm pen ihdeih hunlai tak a hihi. Tua a hihman in Tanglai ipupa te hunlai-in kizep napuan a neih uh a minthansak khat in “ Puan Laisan” a hihi. Hih piuanlaisan pen heisa paak ki etteh hi-in, abulpi a kang hi-in, alaizangah asan zeza  khat pai-in, a tungah leh nuai ah a dum leh a eng, a naipaak cih te tawh kizem in a kigan “Puan Laisan” a hihi. Hih puan laisan pen Tangval te kizepna puan a hihi. Tua puan laisan a silh hun ciangun Tangval a hihna uh,akitheih na hi aa, Zi leh ta neithei ta cihna a hihi. Tua a hihman in Tanglai Tangval te in “Puan Laisan” a silhding uhciangin Ngaklah buang Zumbuang khat in om uhhi. Tua Puan Laisan pen Papi khit ciangin zong kisilh thei veve hi. tau a hih man in hih “ Puan Laisan pen Pasal te kizem na puan hongsuak a hihi.


Puan Mong zem::::Hih Puan Mongzem pen Tualpuan zakang hi-in amongdawn tuak ah abawk litliat a eng leh a naipaak, a dum khawngtawh a kizem hi-in, alangzang ah maimu tang leh siallu suan tawhzong zem uhhi. hih pen Numei Pasal in Puanz tangzang silh uh hi.


Khe Phiou::: Numei Dah ni puansilh::::Hih khe Phiou pen Puanza neukhat hi-in, kiuli nei a vom leh a kang tawh a kizem a hihi. gial bilbial a hihman in “puan Gial” zong kici hi. hihpuan pen khanglui lai-in Dah ni in asilh uh puan a hihi.


Niksing:::: Numei ten NIk:::Hih niksing pen khauvom leh khausan kigankop hi-in, azung leh a mongtengah Zo Mi Numei ten a siamtawp in zem uh hi. Hih azem dan pen tangmaitang,maimu,khiangkawi tawh zem zilzial in vom lehsan kituah hi. a nik sua napen Numei Zadang dawk milmial ciangpha in Zo Mi numei te ten Niksing a hihi.

Kawnggak::: Tanglai ipi ten kawnggak nazang mahmah uh hi. hih akawnggak uhpen “Nuangtang” kici keptawh a kibangin, akang silsel Singgah namkhat hi-in, hih “Nuangtang” te tualkhau khuk cipmahmah tawh khih uhhi. Hih “Naungtang” pen kawng kimvial in gak uh a hihman in, muanhuai mahmah aa, nasep silbawl ciangin ahizongin, Laam na tawnna ah kiviknawh ta leh  anikten uh kia mawkmawk lo in kip mahmah hi.

Taangciin::: Hih Tangciin pen Zo Mi Pasal te kiphasak na/ tungnun na puan aa, kiciamteh a hihi. Hihpuan  pen asan zeza hi aa, alak ah akang neu cikcik tawh a kizemkhat a hihi. Hih puan pen Pasal khat in, sanghang man in akhimzawh leh tua sahang a khimsungin silh uhhi. tualo in gal Aih na leh sa aih na te ah zong silh uh hi. Tualo Taangza aih nate leh Ton nalaam na te ah silh uh hi. Hih Tangciin pen Zo Mi Pasal te lak ah athat, amaan, agozo, atongzo, te a sih uhciangin tangciin puan tawh a luang khuah uh aa, adamlai/ a nuntaak lai aa, amat athah, agoh alup,nate la insa uhhi.Tua bek thamloh in athah a man zui-in siluang kilaam in, sa kinolh ngekngek uhhi. Hih Tangciin pen a tom in genlehang athat aman, a Ai atong, ago alup zote bek silhtheih hi-in Zo Mi Pasal te tungtuan na Puan manpha mahmah khat a hihi.

Puandum::::: Hih puandum pen taanglai numei te tungnun na puan khat a hihi. Khangthak Zo Mi numei ten a melzui-in Puandum a cih uhhangin Tanglai ipupa ten “Tongnok” na ci uh hi. Hih Tongnok a cihna hang uh pen Nupa kop adamlai ten gal leh sa ai-in a tongzolai te bek in silhtheih uh a hihman in, taanglai pau in “Tongnok” a naci uh a hihi. Hih puandum pen a dum leh aeng, anaipaak, tawh kigan aa, sumtaan, sial lusuan, leh taangmaimu tawh zem in etlawm mahmah Zo Mi numei puandum hoih mahmah khat a hihi. Tuaciangin puandum pen Zo Mi numei ten hongsilh in Zo Mi pasal ten puan laisan a hih kei leh tangciin hongsilh uhciangin gamlak vasa Thangho leh Liando te mah bangin etlawm mahmah uhhi. ci-in Tanglai ipupa ten nagen uhhi.
                                                                                            laiat.....Pa Gomang