Wednesday, August 17, 2016
LAWI 8 THU LEH GAMTAM SIAH KAIH NA HONG PIANCIL NA THU
Posted on 3:12 AM by Unknown
LAWI 8 THU LEH GAMTAM SIAH KAIH NA HONG PIANCIL NA THU
Nidang mikang uk hun sung Tedim vuandok U Runder in zogam tangthu tuamtuam te hong kan hi.tua sung pan in Lawi 8 piancil na thu leh Luah Thuam gatam siahkaih ki pat na thu Tedim ulian te a thei kuamah a om kei hi.tua ciang in tangthu thei Teeklui Hausa pa in a thei kha tam ci in Teeklui Hausa pa Pu Neng Gin na sam uh hi.Tedim zumpi ah hong ki sam hi a cih ciang in pu Neng Gin in bangthu bang la om a hia? Kei lah bang mah ki suantak na nei kei veng ci aa a sam pa adot leh a sam pa in hong zui peuh lecin na ci hi.Pu Neng Gin Tedim vuandok zumpi a tun ciang in Lawi 8 piancil na leh Luah Thuam gatam siahkaih ki pat na thu na thei kha hiam?ci in a dot uh leh Pu Neng Gin in a laisai Dim galngap in ngap ing na ci hi.
Lawi 8 piancil na thu
Lawi (8) pian na pen Mualbem khua aa ngaknu khat Heh Thuam a ki ci tangval pan ngai aa,ngaknu nu(ngaknu in) ngai lo aa,Suum Cin a ki ci tangval khat (khup nu beh)ngai zaw ci hi.ni khat ni in misi om aa,a ki gui ni in ngaknu ngaih pa Suum Cin sigal a kongtuam aa tu kim lai Heh Thuam in thau tawh kaplum hi.a kap khit teh ciah pah aa a inn sung ah inn ki sung kalh in ki tom aa a ngap peuh hong kuan un a ci hi.Tua a hih ciang in thu nei upa Hausa ten hi bang in ki thatthat khong leng hoih lo di ci in kua ma liau zawh loh di in cih ngaih sut na tawh mi that peuh mah ih om leh lawi (8) liau di(ki gam di) ci in (upadi) thu khung hi.thu khaam bawl hi.
Lawi (8) liau na pen lawi (6) misi ten ngah di ci hi.Lawi (1) pen inn sian ci in Hausa pan ngah di.Lawi (1) tangpi in ngah di ci in thu bawl uh ci hi.
Lawi 8 piancil na thu Pu Neng Gin in hi bang in na gen hi.
Luah Thuam gatam siahkaih kipat cil na thu
Lophei Hausa pa Luah Thuam in Saizang ah gatam siah a kaih na thu pen Saizang ten Pu Do Tual gatam siah a piak sa,a piak nop nawnloh uh ciang in Tedim vuandok zum ah ki khia uh aa,Do Tual in Luah Thuam tung pan a ngah lam bek thei aa Luah Thuam in gatam siah a kaih ki pat cil na kua man na thei lo uh hi.
Tua cing in pu Neng Gin in hi bang in na gen hi. Pu Luah Thuam in gatam siah a kaih na thu pen Saizang khua inn (370) a phak lai tak in vaipi gal ki ci minam kim in sim aa,gal tai gai a hih man un Saizang khua ah kua mah a teng om nanlo,ki lawi ci hi.
Tua khit ciang in Pu Kaiphung(gualnam beh)in Saizang khua sat kik nuam (teeng ki nuam) a hih man in a nuai aa bang in na vai hawm hi.Saizang khua aa a teng kik nuam leng piak ding teng –
(1) LoPhei hausa pu Luah Thuam___gatam bawm pheeng khat siah.
(2) Mualbem hausapa pu Kaih Mang________vok pi siah kaih
(3) Tungkua hausapa TawnThang___________Temtawng khat
(4) Vanglai hausapa pu Tum Kam____________Temtawng khat
(5) Khuangnung hausapa pu Laang Zaa________Sial a gual khat
A tung aa bang in khua ciat in hausa teng pia aa sim sal tang,zo sal tang hon kaih khop sak un ci in huh na ngen ,sawl ,cial a hih man in sep sak tek uh a hih ciang in Saizang khua ki sat kik zo aa,Khaal khat sung in inn (50) pha kik pah ci hi.
Saizang khua aa teng te peuhmah in kum sim in LoPhei Hausapa Pu Luah Thuam pen gatam bawm pheng khat ciat ki pia hi.
Ni khat ni in Dial teng te ki ci,Pu Tong On in Lophei Hausapa Pu Luah Thuam zi na mat sak aa,Pu Luah Thuam in a zi a tat kik na di sum nei lo in Saizang hausapa Pu Do Tual kiang ah ka zi hon tat sak in la,ka gatam siah kaih hon pia ning ci in vat thum hi.A vat thum ciang in Saizang Hausapa Pu Do Tual in Pu Luah Thuam zi tat kik sak aa Pu Luah Thuam gatam siah kaih pen Pu Do Tual in na ngah hi.cih thu pen pu Neng Gin in na thei hi.
Lawi 8 piancil na thu leh LuahThuam gatam siahkaih ki pat na thu a thei na hang aa pahtawi ngah na
Hih thu tawl khat khit ciang in Tedim vuandok zum pan thu hong tung aaTeeklui khua hausa Neng Gin Tupi thau letsong ki pia hi cih thu hong tung hi.Hih thau pen Falam district mang pipa khut sung pan va sang ding a hih man in a nungzui ding in pu Vungh Pum na zol aa,a ciah akuan khe vive tawh pai pih hi.a ciah a kuan leh Falam a om sung tawh ki gawm in zan (11) sawt hi.Tupi thau letsong a ngah ciang in a U nu pi Gen Niang tung ah lungdam na la dawng khat hong phuak hi.
(a) Miza san phingphung lai ah e humtang bang langh kei hing e.
(b) Zalmang nong matsak nam aw ciin lia nu aw ka min lawi bang thang hi e.
na ci hi.
Hih Tupi thau pen tuni dong in Teeklui innpi pu Neng Gin tu pa Pa Gin Za Pau inn ah om lai hi.
Subscribe to:
Post Comments (Atom)
Myanmar Kyat Exchange Rate
No Response to "LAWI 8 THU LEH GAMTAM SIAH KAIH NA HONG PIANCIL NA THU"
Leave A Reply
na pil na siam na te hong hawm sawn ve.....